boekherstel book repair 2017 taalmonument

Gevorderde boekherstelkursus in die Paarl

Boekherstelspesialis Peter Packery bied van 16 tot 18 Oktober 2017 ‘n gevorderde kursus oor die herstel van ou hardebandboeke by die Afrikaanse Taalmonument in die Paarl aan. Packery het meer as 40 jaar ervaring in boekherstel en -bindwerk, insluitend die herstel van uiters waardevolle boeke. Hy was voorheen by die Suid-Afrikaanse Biblioteek se restourasiedepartement betrokke en het vir 26 jaar sy eie boekherstel-en-bindbesigheid bedryf.

Die driedagkursus fokus op gevorderde tegnieke soos leerbind- en bladgoudwerk. Dit is geskik vir deelnemers wat reeds basiese boek- en papierherstelwerk onder die knie het. Dit word tweetalig aangebied. Die inhoud sluit in: Gevorderde tegnieke en werkprosedures, bind en herstel van leer, alternatiewe bedekkingsmateriale, bladgoudwerk en die gevorderde herstel van die gewone hardebandboek.

Die kursus kos R1 500 per persoon en vind van 09:00 tot 16:30 in die Konferensielokaal in die Besoekersentrum by die Taalmonument plaas. Eie gereedskap (waaronder ‘n beenmes) kan gebruik word of ‘n stel kan teen R200 aangekoop word. Koffie of tee is ingesluit, maar deelnemers moet sorg vir hul eie middagete (of vir Volksmond Koffiewinkel ondersteun).

Die Afrikaanse Taalmuseum en -monument bied jaarliks ‘n hele reeks kursusse en werkswinkels aan wat fokus op die ontwikkeling van basiese vakkundige vaardighede. Vanjaar se program sluit onderwerpe soos argivering (28 tot 30 Augustus 2017), taaltoerisme (21 tot 23 November 2017) en stersirkelsfotografie (11 November 2017 en 10 Februarie 2018) in. Voorstelle vir addisionele werkswinkels oor soortgelyke onderwerpe is welkom. Vir meer inligting, kontak Michelle Visagie by tel. 021 872 3441  of stuur ʼn e-pos na admin@taalmuseum.co.za.

Save