bou jou eie klei museum

Kinders kan voortaan hul eie monument van klei bou wanneer hulle die Afrikaanse Taalmonument in die Paarl besoek.

Volgens Isabeau Botha, Bestuurder van die Taalmonument, kan kinders só op ‘n kunstige, kreatiewe manier ontdek dat die Taalmonument ‘n beeldhouwerk eerder as ‘n argitektoniese werk is.
“Ons gebruik ‘n spesiale soort pottebakkersklei wat self hard word – net so hard soos wanneer dit in ‘n oond gebak sou word. Kinders kan dus hul monumente saam neem huis toe en op ‘n rak uitstal. Die klei se kleur is soortgelyk aan die kleur van die monument, wat met ‘n betonmengsel van Paarl-graniet, wit sand en sement gebou is.”
Botha sê hulle wil met dié aktiwiteit beklemtoon dat die Taalmonument ‘n bestemming vir almal is, oud én jonk.

“Die Taalmonument is ‘n unieke bestemming wat kultuur, natuur én plesier in een pakket aanbied. Ouers kan by Volksmond Koffiewinkel ontspan met ‘n koppie koffie of ‘n glas wyn terwyl hulle kinders in een van ons parkies speel of ‘n klei-monument bou. Gesinne besoek ons graag om in ons pragtige tuin piekniek te hou. Besoekers kan hul eie piekniekmandjie saambring of een by Volksmond bestel. Ons kort wandelpad van 1.2km is ook baie gewild, want dit is geskik vir almal – fiks én onfiks.”

Die klei-aktiwiteit kos R25 per kind. Dit is ‘n buite-aktiwiteit wat slegs beskikbaar is indien die weer dit toelaat, maar die klei-stel kan ook gekoop en tuis gebou word. Groepe van groter as 10 kinders moet vooraf bespreek.

Vir meer inligting, skakel 021 863 4809/0543 of besoek www.taalmonument.co.za.