Die Afrikaanse Taalmuseum en -monument (ATM) is verheug om aan te kondig dat ons twee woorde vir die Woordeboek van die Afrikaanse Taal (WAT) bekom het. Deur die woorde ‘Taal’ en ‘Erns’ {Stemming om ‘n saak in sy ware gedaante, juiste waarde of besondere belang te benader of te beskou, in teenst. met oppervlakkigheid, ligsinnigheid, korswel of skerts…} te borg, help die ATM om hierdie unieke projek te bevorder. Die WAT is ’n omvattende sinchroniese verklarende woordeboek waarmee bittermin van die sowat 7 000 tale op die planeet kan spog. Die woordeboek is omvattend deurdat dit ten doel het om die Afrikaanse woordeskat in sy wydste omvang op te neem (maw alle variëteite van Afrikaans) en ten opsigte van die bewerking van lemmas: al die moontlike betekenisse of betekenisonderskeidings wat ’n woord in Afrikaans kan hê, word in die WAT weerspieël. Lees meer oor die fassinerende WAT-projek hier.
