Kan jy Afrikaans toelies in Arabies of Jawi?

Arabies-Afrikaans, oftewel Afrikaans wat met behulp van die Arabiese alfabet geskryf is, word algemeen aanvaar as die eerste geskrewe vorm van Afrikaans. Talle Arabies-Afrikaanse geskrifte – soos studentenotaboeke, verkiesingsplakkate, publikasies en manuskripte – het behoue gebly; tot dusver is 74 van dié werke wat tussen 1845 en 1957 geskryf is, deur kundiges ontdek en geïdentifiseer. Hieronder tel uitstekende voorbeelde van die vroegste Afrikaanse literatuur. Daar is boonop heelwat onopgetekende Arabies-Afrikaanse geskrifte in privaatbesit; die ATM wil hulle graag digitiseer om dit vir die nageslag te bewaar.

Volgens Michael Jonas, direkteur van die ATM, is die doel van die Afrikaans-Arabiese kompetisies en werkswinkels om ʼn moderne bydrae tot hierdie unieke skryftradisie, te lewer. “Ons missie is immers om onder meer die versweë geskiedenisse van Afrikaans te belig en die ryke diversiteit van Afrikaans se ontstaansgeskiedenis asook haar moderne gedaantes te vier. Daarom wil ons mense aanmoedig om ook op hierdie manier hul deelname aan hierdie taal te herbevestig,” sê hy. “In die Taalmuseum in die Paarl gee ons heelwat erkenning aan Abu Bakr Effendi wat in die 1800’s ʼn groot rol in die ontwikkeling van Arabies-Afrikaans en derhalwe ook Afrikaans in die Bo-Kaap gespeel het. Ons wil graag sien dat die Afrikaanse gemeenskap hierop voortbou.”

• Bron: https://af.wikipedia.org/wiki/Arabiese_Afrikaans
• Uit Moesliemafrikaans kom “toelies”, vir Arabiese skrif en letters, en ook as werkwoord vir ‘skryf’: Die eerste koplesboek in Afrikaans was ’n kitaab getoelies in Arabies. https://www.afrikaans-vandag.co.za/…/nuwe-woorde…/ Van die Indonesiese woord ‘tulis’ – ‘om te skryf’.

Lees hier oor die eerste kompetisie se wenners en kyk hier na die top-12-inskrywings (2020) en top-13 (2022).

Klik hier vir Arabies-Afrikaanse alfabet en voorbeelde deur M Alexander

Vir die inskrywingsinligting, Afrikaanse voorbeelde, aanlynbronne, Arabiese sleutelborde ensovoorts, sien www.taalmuseum.co.za/arabies-afrikaans/

– Skryf of vind ʼn teks in enige genre en variëteit van Afrikaans (standaard, Griekwa, Nama, Kaaps ens) in die Romeinse skrif of skryf iets direk met behulp van die Arabiese skrif – maksimum 150 woorde lank.

– Skryf dieselfde teks in Arabiese skrif OF Jawies (Arabiese skrif, soos aangepas vir spesifieke Afrikaanse klanke) OF in beide, reël vir reël.

– Die Arabies weergawe moet links en die Romeinse weergawe regs wees  – sien die voorbeelde.

– E-pos jou inskrywing met jou volledige naam, adres, telefoonnommer en e-posadres na bemarking2@taalmuseum.co.za. Dit moet duidelik leesbaar en verkieslik in word- of pdf-formaat wees om die beoordeling te vergemaklik. .jpg sal egter aanvaar word.

– Slegs 1 inskrywing per persoon, maksimum 150 woorde (dit kan korter of langer wees, maar slegs die eerste 150 woorde word beoordeel).

– Vorige kontantpryswenners kan deelneem, maar sal nie vir die top-3 posisies oorweeg word nie. Hul werk sal wel vir die top-12 vir die Groen Galery-uitstalling oorweeg word.

– Kompetisie eindig op 26 Augustus 2022 en is oop aan almal. Die wenners en uitstallers sal binne ‘n maand daarna in kennis gestel word, en dit sal via sosiale media en die ATM se webtuiste bekend gemaak word.

– Die beoordelaar is dr Shamiega Chaudhari, van die fakulteit opvoedkunde aan die Kaapse Skiereiland-Universiteit vir Tegnologie .

– Omrede daar nie ʼn gestandaardiseerde Arabiese of Jawiese weergawe van Afrikaans is nie, sal deelnemers se werke nie gemeet word aan wat absoluut korrek is nie, maar aan die oorspronklikheid en leesbaarheid daarvan.

– Die wenner sal R5 000 kontant ontvang en die twee naaswenners R2 500 elk, geborg deur die Historium Trust. Al drie wen ook ‘n gesinsjaarpermit vir die ATM wat onbeperkte besoeke vir vier mense aan die monument, museum, koffiewinkel en volmaanpieknieks insluit. Die beste 12 inskrywings sal in die monument se Groen Galery uitgestal word.

– Bepalings en voorwaardes geld. Geen korrespondensie sal oor die uitslae gevoer word nie.

Vir enige navrae of om via WhatsApp in te skryf, kontak Jeffrey Pietersen op +27 (0)76 017 6026 of bemarking2@taalmuseum.co.za.

ARABIC-AFRIKAANS ALPHABET (45 letters)

by Mogamat Alexander in ‘Dictionary of loanwords in the Cape Muslim vernacular’
Click here for Arabic-Afrikaans alphabet and examples by M Alexander

ARABIC ALPHABET (30 letters)

JAWI ALPHABET (37 letters)

Vowels